Onder dizze titel schreef ik een jaor of wat leden een stuk in het dagblad ‘Trouw’. Dit was de tekst:
Ik ben gien Hollander!
We woont, zeg mien paspoort, in Het Keuninkriek der Nederlanden. We zegt miestal körtweg Nederland. Maor aj niet beter weet, zoj dèenken dat het laand aans het: Holland. Gao maor nao. Tillevisie: Heel Holland bakt, Ik hou van Holland, Hollandse zaken, Holland Sport, Holland Doc, The voice of Holland, Holland got talent. Sport: de Holland Acht, het Holland House, Team Holland. Het bedriefsleven: Holland Casino’s, Holland International. En as het een beetie vrös heb we het vortdaolijk over Hollandse taferelen. Ok al giet het over de Elfstedentocht. Het liekt ja wel of we in Holland woont.
Ik weet het wel, het bekt lekker. Makkelijker as Nederland. Maar ik ben gien Hollander. Ik ben een Drent, mien eerste taal is Drèents, beheurend bij het Nedersaksisch, een taol die nog altied in Noord- en Oost Nederland deur naar schatting anderhalf miljoen mensen dagelijks gebruukt wordt. Een taol die van Urk tot an Polen in hiel veul varianten spreuken wordt. De Lantschap Drenthe stun as ondertekenaor in 1580 onder de Unie van Utrecht, de start van Nederland. Maor tot 1813 heurden we niet bij de Staoten-Generaal. Reden: we we waren niet riek genog. Drenthe much trouwens wel overal an metbetalen. Holland, dat is dat deel van Nederland waor ze dèenkt dat Drenthe veural neudig is veur zien bodemschatten. Of het nou om turf, eulie of eerdgas giet.
Maor as het in Nederland om bezunigen giet, mut de pijn geliek verdeeld worden. Gevolg: om de haverklap mut we naor Den Haag om kazernes en gevangenissen niet kwiet te raken. Oonze burgemeester, Klaas Smid, mut het padtie warm holden aans kuw der naor fluiten. Maor as het om overlast en risico’s giet telt geliek delen niet. Let maor ies op: dommiet kuw weer de straot op veur zuks as de CO2-opslag. En schades deur de gasopslag of de gaswinning is ok aal roppen en knooien.
Nee, as het om dat soort dingen giet is het nooit Holland maor aaltied Nederland.
Ik ben een Drent, veuruut: een Saks, maor beslist gien Hollander.
Tot zowied de tekst in Trouw.
En laot ik nou geliek kriegen! Want wat zeg de overheid?
Dit: 25 jaar lang was het simpel. In het buitenland zei je voor het gemak I’m from Holland, dat kende immers bijna iedereen. Maar Holland is niet meer. Vanaf morgen ( 1 januari 2020) zeggen we, als het aan de overheid ligt, The Netherlands.