Schots & Schief

(bliespel in drie bedrieven)

Bezetting: 7 mannen / 4 vrouwen of 6 mannen / 5 vrouwen

Korte inhold:
In het café is vanaovend een vergaodering van de landinrichting. Veurzitter Hadders hef die belegd om de grondruil tussen boer Hofsteenge en Natuurmonumenten of te ronden. Het is vlak veur de kerst en hij wil het dit jaor nog ofronden.
Veurof komp Anna Heuving een happie eten. Lammie Dolfing bedient heur. Die hef wel in de gaten dat Anna geern wat beter in de kunde kommen wil met Harmjan Hofsteenge en besprek met heur de kaans om daor wat an te doen. Dan komp Berend Boels binnen. Hij is die dag wezen jagen met Marten bij een hobbyboer in de buurt van Wiester. Die hef ok schaopen.
Dan heuren ze bij Radio Drenthe dat in de buurt van Wiester de Schotse Mekkerziekte uut breuken is. Dizze veeziekte hef as symtomen dat schaopen der evenwichtstoornissen van kriegen en niks aans doet as mekkern. Het is ok besmettelijk veur mèensen. Ie kunt der wel tegen inent worden. Het giet vlot weer over, maor ie bent wel een dag of drie onder dak der met. Weliswaor is het niet arg gevaorlijk, maor wel slim besmettelijk. Lammie kreg een idee. As nou Berend daor in de buurte west hef en die kreg het vanaovend dan wordt het café ofsleuten en hebt Anna en Harmjan tied om mekaor wat beter te kennen leren. Zo gezegd zo gedaon. Maor ja, zoas aaltied löp het net wat aans.

Opmarkings van het Huus van de Taol:
Actuele thema’s verwarkt in komische situaties. De schrijfstijl is prettig; lengte en opbouw van het verhaal bint ok dik veur mekaar.
In het darde bedrief is der op de vloer een slaopstee veur de vrouw lu inricht.
Pas op veur te veul spullen op het teniel. De speulers mut de ruumte hebben um te bewegen.
De rolverdeling (7 mannen en 4 vrouwen) zal problemen op kunnen levern wat bezetting betreft. De schriever hef daorom ok een variant beschikbaor veur 6 mannen en 5 vrouwen.